Në kuadër të bashkëpunimit të UPT dhe UT me Eksperimentin CMS (Compact Muon Solenoid) të CERN-it (Këshilli Europian i Kërkimeve Bërthamore) në Gjenevë (Zvicër), anëtarët e UPT/CMS-Albania si pjesë akademike, përfaqësues të Universitetit Politeknik të Tiranës në këtë bashkëpunim, realizuan trajnimin e parë zyrtar në Këshillin Evropian të Kërkimit Bërthamor (CERN) në Gjenevë të Zvicrës, në periudhën 01-07 Dhjetor 2024. Ekipi punoi në grupin e Resistive Plate Chambers (RPC), si pjesë e bashkëpunimit ndërkombëtar të Compact Muon Solenoid (CMS) në laboratorin 904, në Prévessin.
Universiteti Politeknik i Tiranës në këtë trajnim u përfaqësua nga:
- Prof. Asoc. Dr. Altin Gjevori,
- Prof. Asoc. Dr. Dafina Xhako,
- Prof. Asoc. Dr. Driada Mitrushi,
- Enkelejd Çaça.
Grupi shqiptar u përfshi në aktivitetet e grupit të punës së iRPC, dhe u trajnua në asemblimin e detektorëve iRPC, asemblimin e sistemeve elektronike të leximit të sinjalit FEB (FrontEnd-Board). Gjithashtu u krye testimi i Shintilatorëve dhe Fotoshumëzuesve në Stacionin Kozmik dhe u bënë gati për tu dërguar në Shqipëri, si pjesë e ndihmës për ngritjen e një laboratori RPC në UPT, Shqipëri. Një pikë tjetër e rëndësishme përveç trajnimit të anëtarëve, ishte informimi i bashkëpunëtorëve tanë në këtë eksperiment në CERN mbi pritjen dhe parapërgatitjen të fazës së parë të trajnimit të dy studentëve doktorantë të UPT.
Gjithashtu grupi i punës zhvilloi takime me përfaqësuesit shkencorë të projektit dhe të CERN, nga të cilët u sigurua mbështetja për ngritjen e infrastrukturës laboratorike në ambientet e UPT, Shqipëri.
