Projekti: “Vlerësimi i ndikimit të djegies së mbeturinave, në vende të hapura, në ndotjen e ajrit në Shqipëri” (Shtator 2024 – Mars 2025), i financuar nga AADF (Albanian-American Development Foundation). Ky projekt kërkimor po realizohet në bashkëpunim me Prof. Dr. Dhimitër Bello e stafin e tij, nga UMASSLowell (University of Massachusetts Lowell) në kuadër të Programit READ (Research Expertise from the Academic Diaspora).
Objektivat e Projektit:
• Të vlerësohet përbërja kimike e PM-ve duke përfshirë metalet e rënda, përbërjet organike – benzenin, formaldehidin, PHA-të dhe të kryhen matjet për gazet, si: NOx, SO2, O3, CO dhe CO2 për të kuptuar më mirë burimet kryesore të ndotjes për agjentë specifikë.
• Të krijohet një program monitorimi afatgjatë, rigoroz dhe i besueshëm për ndotësit me shqetësim madhor në Shqipëri (duke përfshirë gjashtë kriteret e ndotësve).
•Të gjurmohen burimet dhe të vlerësohet (duke përdorur kiminë e ndotjes) ndikimi që sjell në cilësinë e ajrit dhe në shëndet djegia në mjedise të hapura e mbetjeve urbane/komunale.
Në kuadër të këtij projekti u zhvillua Leksion i hapur nga Prof. Dhimiter Bello në FIMIF: “Pse duhet të kujdesemi për ajrin që thithim? Çfarë të bëni për këtë?”
Leksioni u zhvillua më 30 Tetor 2024 në FIMIF-UPT me studentë të Inxhinierisë Kimike dhe të Inxhinierisë së Mjedisit (FIN-UPT) mbi kiminë, toksikologjinë dhe epidemiologjinë e ndotjes së ajrit dhe nanogrimcave. Ky prezantim interaktiv u përqendrua në paraqitjen e evidencës epidemiologjike, tashmë të qartë, për barrën globale të sëmundjeve të shkaktuara nga ndotja e ajrit (infeksionet e rrugëve të poshtme të frymëmarrjes, goditjet në tru, sëmundjet ishemike të zemrës, sëmundjet pulmonare obstruktive kronike dhe kanceret e mushkërive), e ndjekur nga rëndësia e saj për Shqipërinë.
Për të mësuar më tepër rreth këtij leksioni klikoni këtu.
