Gjatë praktikës mësimore në kompaninë metalurgjike “Zodiac sh.p.k”, studentët u njohën me procesin teknologjik të riciklimit të aluminit dhe fazat kryesore të përpunimit industrial. U vëzhgua ndarja dhe seleksionimi i materialit përmes magneteve, rrezeve X dhe teknologjisë Vortex, si dhe trajtimi termik i aluminit në temperatura të larta.

Gjithashtu, u analizuan proceset e degazimit, filtrimit dhe formimit të produktit final në lingota, pllaka dhe shufra alumini. Vëmendje e veçantë iu kushtua sistemeve të trajtimit dhe pastrimit të shkarkimeve në ajër, të cilat sigurojnë respektimin e standardeve mjedisore dhe minimizimin e ndotjes gjatë procesit të riciklimit. Kjo praktikë ndihmoi studentët të lidhin njohuritë teorike të lëndës së riciklimit të materialeve me zbatimin praktik në industri.